രാമക്കൽമേട് - The cradle of wind.

   

ഏനാത്തെ അഞ്ചുമലപ്പാറയിൽ പോകാനിറങ്ങിയതാണ്. രാവിലത്തെ കാപ്പിക്ക് രണ്ടാളും കാണും എന്ന് പറഞ്ഞ് വീട്ടിൽ നിന്ന് പുറപ്പെട്ടിട്ട് ഒടുവിൽ പിറ്റേന്നത്തെ കാപ്പിക്കാണ് എത്തിയത് ! vibe -ന്റെ കൊടുമുടി കണ്ട ഒരു അപ്രതീക്ഷ ട്രിപ്പ്.

സഹസഞ്ചാരിയോട് വെറുതെ രാമക്കൽമേട് എങ്ങനെയുണ്ട് ? എന്ന് ചോദിക്കുമ്പോ, തിരിച്ചൊരുത്തരം പ്രതീക്ഷിച്ചതാണ് പക്ഷേ വന്നതൊരു മറുചോദ്യമാണ്.

പോയി നോക്കിയാലോ?

അപ്പോ തന്നെ google map ൽ From your location to Ramakkalmedu അടിച്ചു;176 Km, 5hr.

Bajaj CT 100 ൽ 300₹ ക്ക് എണ്ണ അടിച്ചു. അങ്ങോട്ടേക്കുള്ള വഴിയിൽ പാഞ്ചാലിമേട് 7 Km എന്നൊരു ബോർഡ്, Destination changed എന്ന് പറയണ്ടല്ലോ? fees ഒരാൾക്ക് 20₹ . വളരെ കുറച്ച് ആളുകളേയുള്ളൂ, അവിടെ കുറച്ച് വിശ്രമം ഒരു ചെറുമയക്കം . ATM ൽ നിന്ന് 500₹ എടുത്തിണ്ടുണ്ടായിരുന്നു, അത് കടയിൽ കയറിനോക്കുമ്പോ ഒരു മൂല ഒരൽപം കീറി ഇരിക്കുന്നു, Scene Dark. ബഡ്ജറ്റ് 800₹ ആണ്, അതിലെ 300 ന്റെ ബാക്കിയാണ് 500. അതു ആരും മാറി തന്നില്ലെങ്കിൽ പണി പാളി എന്ന് പറഞ്ഞാൽ മതീല്ലോ. എന്തായാലും Propose ഗേറ്റിനടുത്ത് കട നടത്തുന്ന ഒരച്ചായൻ നോട്ട് മാറിത്തന്നു. അപ്പോഴാണ് ശ്വാസം നേരെ വീണത് (ഇത് പോലത്തെ ഒന്ന് രണ്ട് ദൈവദൂതൻമാർ കൂടി ഉണ്ട്ട്ടോ). പോകുന്ന വഴിക്ക് ഒരു ചെറിയ ഹോട്ടലിൽ കയറി, സംഗതി അകത്തുകയറിയപ്പോ കിടുക്കാച്ചി view. ഒരു view Point ൽ മേശയും കസേരയുമിട്ടിരിക്കുന്ന പോലെയുള്ള setup. എന്തായാലും സംഗതി ഉഷാറാണ്. കൗതുകം ഇതൊന്നുമല്ല, കടയിലെ മുതലാളി നമ്മുടെ മൈലക്കാട്കാരനാണ് (കൊല്ലം ഡാ). മുതലാളിടെ അച്ചൻ കമ്യൂണിസ്റ്റ് പാർട്ടിയുടെ പ്രചരണത്തിന് വേണ്ടി ഇടുക്കിയിൽ എത്തിയതാണ്. പുറത്ത് രണ്ട് വനം വകുപ്പ്ക്കാർ കാക്കി പാന്റ് ഒക്കെ ഇട്ട് നിൽപ്പുണ്ടായിരുന്നു, അവർ കേൾക്കാനായിരിക്കണം, മുതലാളി ഇടയ്ക്കിടക്ക് അൽപം ശബ്ദം കൂട്ടി പറയും "പണ്ട് കമ്മ്യൂണിസ്റ്റ് കാരെ കണ്ടാൽ പോലീസുകാർ ഓടിച്ചിട്ടു തല്ലും. അച്ചനെ ഒരുപാട് ഉപദ്രവിച്ചിട്ടുണ്ട് ". പുള്ളീടെ Narration കേൾക്കാൻ നല്ല രസാണ്, ദേശിംഗനാടിന്റെയും തിരുവിതാംകൂറിന്റെയും ഒക്കെ ചരിത്രം പറയുന്നുണ്ട്. കേൾക്കാനുള്ള സമയ പരിമിതി മൂലം സലാം അടിച്ചു പിരിഞ്ഞു.

പ്ലാൻ ഒന്നും ഇല്ലാത്തതിനാൽ ( പ്ലാൻ ചെയ്ത യാത്രകളൊന്നും നടന്നട്ടില്ലാ എന്നത് വേറൊരു കാര്യം ) തൊപ്പി, ജാക്കറ്റ് ഇത്യാദി വസ്തുക്കളൊന്നും കയ്യിലില്ലാ. തണുപ്പ് ആണേൽ കിക്കിടിലവും. പോകുന്ന വഴിക്ക് പീരുമേടുള്ള പീർ മുഹമ്മദ് വലിയുള്ള (റ) വിന്റെ മഖ്ബറയിലും കയറി. അങ്ങോട്ടേക്കുള്ള വഴി കട്ട off road ആണ്. പിന്നെ CT 100 നു വലിയ ഭാരം ഇല്ലാത്തതിനാൽ സുഖത്തിലങ്ങ് കയറി, ഇറങ്ങി, കുലുങ്ങി അങ്ങ് പോയി.

2:45 ഒക്കെ കഴിഞ്ഞപ്പോ ഒരു ചെറിയ മഴ front ൽ ഷെഡ്ഡുള്ള ഒരു കടയിൽ കയറി, അതാവുമ്പോ വണ്ടി നനയാതെ വെക്കാം. അവിടുന്നൊരു കട്ടൻ ചായ കുടിച്ചു തെയിലയുടെ നാട്ടിൽ തെയിലയിട്ട വെള്ളത്തിന് 10 ₹ , പുറത്തൂന്ന് തെയില കൊണ്ടുവരുന്ന നമ്മുടെ നാട്ടിൽ പാൽ ചായക്ക് 8 ₹ . ബല്ലാത്ത ജാതി അറുപ്പ് തന്നെ. അവിടുന്ന് മഴ തോർന്നപ്പോ നേരെ രാമക്കൽ മേട്. രാമക്കൽമേടിന് 3 Km മുമ്പ് ഇടത്തറമുക്ക് എത്തിയപ്പോ ഫോണിന്റെ ബോധം പോയി. അവിടെ ഒരു കടയിൽ കുത്തിയിടാൻ കൊടുത്തിട്ട് മല കയറി. Ramakkalmedu - The cradle of wind എന്ന ബോർഡ് കാണാറായി. ടിക്കറ്റ് എടുത്ത് കേറി തുടങ്ങുമ്പോൾ തെളിഞ്ഞ കാലവസ്ഥയായിരുന്നു, അതിഥിയെ കാത്തിരുന്ന ആതിഥേയനെപ്പോലെ കോട നേരിട്ടു വന്നങ്ങു വരവേറ്റു. മുകളിൽ എത്തിയതും ഒരു കാറ്റിന്റെയും ചെറിയ ചാറ്റലിന്റെയും അകമ്പടിയോടെ കോടയുടെ എഴുന്നള്ളത്ത്, പിന്നെ ഒരു 50 m ഒക്കെ കാണാം ബാക്കി full വെള്ളയാണ്, കൂടെ നല്ല ഒന്നാന്തരം കാറ്റും. vibe എന്നാൽ vibe ന്റെ മേലേ vibe ആയിരുന്നു. അവിടുന്ന് ഇറങ്ങിട്ട് ഇപ്പുറത്തെ രാമകല്ലിലേക്ക്. തുടക്കം മുഴുവർ തെറ്റുന്ന ചെളിയാണ്, അയിനു മുകളിൽ ആർച്ച് പോലെ മുളക്കാട് കാറ്റത്തു മുളയുടെ അടിയിൽ നിന്നാൽ എല്ലാം കൂടി ഒടിഞ്ഞ് ഇപ്പോ തലയിൽ വീഴും എന്ന മാതിരിയുള്ള ഒച്ച. ഒരു ചെറിയ ട്രെക്കിങ്, മുകളിലാണ് മഞ്ഞിന്റെ പകർന്നാട്ടം. ഏറ്റവും അറ്റത്തെ പാറത്തു മ്പിൽ ഇരുന്നാൽ നേരെ മുന്നിൽ ആകാശവും കോടയും ചേർന്ന് സൃഷ്ടിക്കുന്ന ആ ഒരു illusion,. ഒരു ഒന്നാന്തരം കാഴ്ച നേരെ മുന്നിൽ പരന്ന വെള്ളത്തുണി നിവർത്തിപിടിച്ച പോലെ, അതിനകത്തേക്ക് വെള്ള കുഞ്ഞു കുഞ്ഞു സുഷിരങ്ങൾ. ചെവിയിൽ കാറ്റിന്റെ ഘോഷം മാത്രം. മറ്റേതോ ലോകത്ത് എത്തിപ്പെടും പോലെ, പ്രകൃതിയുടെ ഇന്ദ്രജാലം. ആകാശം ഒഴുകി ഇറങ്ങിയ പോലെ. കട ഏഴു മണിക്കു അടക്കുമെന്നതിനാലും ഫോൺ തിരികെ വാങ്ങണമെന്നതിനാലും മനസ്സില്ലാ മനസ്സോടെ മല ഇറങ്ങി. വിട്ടു പോരാൻ വയ്യാത്ത പോലെ റോഡിലും കുറേ ദൂരം മഞ്ഞ് കൂടെ വന്നു, എന്നിട്ട് യാത്ര പറഞ്ഞു പിരിഞ്ഞു. തിരികെ പോരുമ്പോ വഴി തെറ്റി, ഫോൺ വെച്ച കടയിലൂടെ തന്നെ പോകണമല്ലോ ആ സ്ഥലപ്പേരാണങ്കിൽ (ഇടത്തറമുക്ക് ) ഓർമയും ഇല്ല. അവിടെയാണെ ചുറ്റിനും റോഡും. ഒരു ചേട്ടനോട് വഴി ചോദിച്ചു (ദൂതൻ -2) അവിടെയൊരു പള്ളി ഉണ്ടായിരുന്നു എന്നതാണ് ആകെ അറിയാവുന്ന അടയാളം. അവിടുന്നാണ് അസർ നിസ്കരിച്ചത്. പുള്ളിക്കാരൻ കുറച്ചു നേരം ആലോചിച്ചിട്ട് തൂക്കുപാലം ആയിരിക്കണം ആ സ്ഥലം എന്ന അനുമാനത്തിൽ എത്തി. എങ്കിലും പുള്ളിക്ക് ഒരു ഉറപ്പില്ല. ഞങ്ങൾ വണ്ടി തിരിച്ചപ്പോ പെട്ടന്ന് പുള്ളി വിളിച്ചിട്ട് പറഞ്ഞു " ആ കടയിൽ വെച്ച ഫോൺ നമ്പർ പറ അതിൽ വിളിച്ചു ചോദിക്കാമല്ലോ" എന്ന് . Nice idea

ചുരം ഇറങ്ങി തുടങ്ങയിപ്പോളാണ് ജാക്കറ്റിന്റെ വിലയറിഞ്ഞത്, നല്ല കിടുങ്ങുന്ന തണുപ്പ്. ഇടയ്ക്കിടക്ക് നമ്മളെ കടന്ന് ലോറികൾ പോകുമ്പോൾ അതിന്റെ ടയറിൽ നിന്നൊരു ചൂട് കിട്ടും, അത് നൽകിയ ആശ്വാസം ചെറുതൊന്നുമല്ല. നമ്മടെ നാട്ടിലെങ്ങാനും ഒരു ലോറി റോട്ടിൽ കണ്ടാൽ ദേഷ്യമാണ്. ഇവിടെ ഒരു ലോറി ഇപ്പോ ഇതു വഴി പോണേ എന്നായി പ്രാർത്ഥന. അതാണ് പറയുന്നേ ഈ ലോകത്ത് ഉപയോഗമില്ലാത്ത ഒരു സാധനവും ഇല്ലെന്ന്.

കുറച്ച് ഇങ്ങ് വന്ന് അത്തിക്കയം കഴിഞ്ഞപ്പോ ഫോണിന്റെ രണ്ടാമത്തെ ബോധം പോകൽ. വഴിയിലാണെ Street light ഒന്നുമില്ല. രണ്ട് വശത്തും തോട്ടങ്ങൾ മാത്രം. ഒരൂഹത്തിൽ അങ്ങനെ മുന്നോട്ട് പോയി നോക്കുമ്പോ എന്നെ ആരെങ്കിലും ഒന്നു താങ്ങണെ എന്ന മട്ടിൽ ഒരു ബോർഡ് - വെച്ചൂച്ചിറ പോലീസ് സ്റ്റേഷൻ - എന്നാപ്പിനെ സ്റ്റേഷനിൽ കയറി വഴി ചോദിക്കാം എന്ന് വിചാരിച്ചു വണ്ടി തിരിച്ചപ്പോ ഒരു പെൻ ടോച്ചർച്ചുമായി ഒരാൾ എവിടുന്നോ പ്രത്യക്ഷപ്പെട്ടു (ദൂതൻ -3). അനീഷ് എന്നോ മറ്റോ ആണ് പേര് പറഞ്ഞത്. സാറന്മാര് പഠിപ്പിക്കും പോലെ വഴി പറഞ്ഞു തന്നു. റാന്നിയിൽ ചെന്നിട്ട് പോകാനുള്ള വഴി. പിന്നെയങ്ങനെ മുന്നോട്ട് പോയപ്പോ ഒരാൾ വീടിന്റെ ഫ്രണ്ടിൽ നിന്ന് ഫോൺ വിളിക്കുന്നു (ദൂതൻ - 4). നിഹാല് വെറുതെ വഴി ചോദിച്ചു. പുള്ളി ഫോൺ ഒക്കെ കട്ട് ചെയ്ത് റോഡിനപ്പുറം നിന്ന് വഴി പറഞ്ഞു പറഞ്ഞു അവസാനം റോഡിന്റെ നടുക്ക് നിന്നായി വഴി പറച്ചിൽ. മാപ്പ് പോലും ഇങ്ങനെ വഴി പറയൂല. മറ്റേ പുള്ളിക്കാരൻ പറഞ്ഞതിനേക്കാൾ കുറച്ചുടെ എളുപ്പമുള്ള വഴി. ആ റോഡു വഴി നേരെ ഇങ്ങ് പോരുന്നു. ഇടയ്ക്ക് പോലീസ് കൈ കാണിച്ചു പിന്നെ RC book ചോദിച്ചു. ഫോൺ switch off ആയതിനാൽ ഡിജി ലോക്കറിന്നും കാണിക്കാൻ പറ്റില്ല. ആദ്യം കുറച്ച് ചോദ്യങ്ങൾ ഒക്കെ ചോയിച്ചിട്ട് അവസാനം fine അടിക്കാതെ വെറുതെ വിട്ടു ( നൻമയുള്ള ലോകമെ.........). എന്തായാലും 1 മണിയോട് കൂടി വീട്ടിലെത്തി.